رحیم یار خان (بیورو رپورٹ/خالد جتوئی)
میاں والی قریشیاں وچ واپڈا اہلکاراں دی بدمعاشی تے غنڈہ گردی عروج تے پُڄ ڳئی اے۔ واپڈا ٹیم ݙیںھ ݙپہرے علاقے دا ٹرانسفارمر لاہ تے نال گھن ڳئی اے، جیندے پاروں پورا علاقہ اندھارے وچ ݙُب ڳئے تے لوک شدید گرمی وچ شدید پریشان ہن۔

مقامی لوکاں دا آکھݨ اے جو واپڈا اہلکاراں جان بُجھ تے ٹرانسفارمر لاہے تاں جو انہاں توں رشوت بٹوری ونڄ سڳے۔ ݙوجھے پاسے ایں ناانصافی تے جݙاں سرائیکی نیوز دے بیورو چیف خبر بݨائی تاں واپڈا اہلکاراں انتقامی کاروائی کریندے ہوئے صحافی دے گھر دا میٹر وی لاہ تے نال چا ڳئے۔

بیورو چیف دے مطابق انہاں دے میٹر دا کوئی بقایا جات وی کائناں ہا، انہاں کوں صرف سچ لکھݨ تے خبر بݨاوݨ دی سزا ݙتی ڳئی اے۔

علاقہ مکیناں ایس ڈی او واپڈا تے ایکسین رحیم یار خان توں مطالبہ کیتے جو معاملے دا فوری نوٹس گھدا ونڄے، ٹرانسفارمر واپس لایا ونڄے تے صحافی نال بدلہ گھنݨ والے اہلکاراں دے خلاف سخت قانونی کاروائی کیتی ونڄے۔ لوکاں خبردار کیتے جو اگر بجلی جلد بحال نہ تھئی تاں او کے ایل پی روڈ بلاک کر کے شدید احتجاج کرݨ تے مجبور تھیسن۔