میلسی وچ میونسپل کمیٹی دی حدود اندر موجود واحد عوامی پارک انتظامیہ دی عدم توجہی دے باعث زبوں حالی دا شکار ہو گیا ہے۔ جتھاں کڈے بچے جھولیاں تے کھیلدا ہن تے خاندان تفریح لئی آ کے بیٹھدے ہن، اوتھاں ہُن اک وی جھولا موجود کائنی، تے فیملی دے بیٹھن لئی وی مناسب ماحول باقی کائنی۔

میلسی دے شہریاں دا آکھݨ ہے جو میونسپل کمیٹی دی حدود وچ موجود ایہہ واحد پارک انتظامیہ دی غفلت دا منہ بولدا ثبوت بن چکا ہے۔ پارک دی مناسب دیکھ بھال، صفائی تے سکیورٹی نہ ہون دے باعث فیملیاں نے اتھاں آوݨ تقریباً چھوڑ ڈتا ہے۔

شہریاں دے مطابق پارک وچ مختلف غیر ضروری افراد دی موجودگی وی ویکھݨ کوں ملدی ہے، جندے وچ جواری تے نشہ کرݨ والے افراد وی شامل ہن، جندے باعث خواتین، بچے تے فیملیاں لئی پارک دا ماحول محفوظ تے مناسب نئیں رہیا۔

شہریاں نے میونسپل کمیٹی میلسی دے اعلیٰ افسران، چیف آفیسر میونسپل کمیٹی تے اسسٹنٹ کمشنر میلسی کولوں مطالبہ کیتا ہے جو پارک دا فوری نوٹس گھدا ونڄے، پارک دی مکمل صفائی، تزئین و آرائش تے مرمت کرائی ونڄے، بچوں لئی نئے جھولے تے تفریحی سہولتاں فراہم کیتیاں ونڄن۔

شہریاں دا ایہہ وی مطالبہ ہے جو پارک وچ مؤثر سکیورٹی انتظام، باقاعدہ نگرانی تے غیر متعلقہ افراد دی روک تھام یقینی بنائی ونڄے، تاں جو میلسی دے بچے تے فیملیاں بلاخوف اتھاں تفریح کر سکن۔

عوامی حلقیاں آکھیا ہے جو شہر دے واحد عوامی پارک کوں اجڑن توں بچایا ونڄے تے اینوں دوبارہ آباد کر کے شہریاں لئی محفوظ تے خوبصورت تفریحی مقام بنایا ونڄے۔